Undereinisch isch es zämegsetzts Wort. Sini beide Teile si under u einisch. Einisch oder einischt isch d Mundaartfoorm vom aute dütsche Wort eines. Das isch en adwärbiaale Genitiiv zum Wort ein u meint «einmal». Mir bruuche das Wort no viiu, säge einisch mee, einisch lenger, los einisch, früecher einisch, glii einisch, wo men im Schriftdütsche mal seit: mal mehr, mal weniger, hör mal. Im Schriftdütsche begägne mer däm auten eines nume no im Wort einst.

Wiu me ds Wort under fürn e Zit het chönne bruuchen im Sinn vo «innerhalb einer Frist». Under eme Jaar het me chönne säge für «im ene Jaar» oder das mues under drei Taag gschee für «das mues i drei Taag passiere». Undereinisch heisst auso «innerhalb von einem Mal», u das meint wi auf einmal äbe «plötzlich».