Gigetschi isch meh aus nùme ds «Kerngehäuse» vore Frucht, i de Regla hets o de Stüu ù d Flüüga no dran. Hochtütsch entspricht daas eppa im Wort Spindel. Wäge ds Chäärnghüüs isch uursprünglich würklich nùme d Mitti vom Öpfù, wo d Chäärne drin sy, o we mùs hüt meischtens fùr e ganz «Spindel» bruucht.

Gigetschi isch ganz tüppisch im nöördliche Kanton Bäärn ù im süüdliche Solothurn. Aber di meischte Bäärner ù d Frybùùrger sääge Gröibschi, Gräibschi, Grübschi oder Gröitschi. A Groostüu vo de Innerschwizer, de Emetaaler ù de Gomser sääge Bätzi oder Bätzgi. Z Sanggale, Appezäu ù Thurgau isch de Räschte vom Öpfù s Bitzgi, bi de Bündner Buschgi oder Bitschgi. S Bixi hiisst es z Schaffhuuse, de Groosrumm Zürich siit im Uberräscht Bütschgi. U schliesslich isch im Aargau ù im öschtliche Basùlann Üürbsi oder Güürbsi gfragt, ù im weschtliche Basùlann ù im Schwarzbuebelann ds Güegi. As git no vereinzelti Foorme wy de Bäck rùnd ùm Schwyz, d Spuele oder ds Ggäggi im öschtliche Bäärnbiet oder de Murmutz ù ds Indri im Wallis.